Israel PM thar nen an inhmuh ṭumin Biden a muthlu : Netanyahu

Israel prime minister hlui Benjamin Netanyahu chuan Pathianni khan a facebook video post kaltlangin U.S. President Joe Biden chu Israel PM thar Naftali Bennett nen an inhmuh ṭuma a muthlu lai nia sawi chu a pholang.

Social media hmangtu ṭhenkhat chuan Oval office-a Bennent-a'n thu a sawilai hian U.S. President chu chhuat lam en chungin a muthlu lai video hi an lo share tawh bawk a ni.

Reuters chuan an chhuichiannaah he video hi khawihdanglam a nih thu an sawi. Video clip pakhat an cut hnu rei loteah hian Biden chuan Bennett a chhanna hi a awm leh a ni.

Kum 71-a upa right-wing Likud party hotu Netanyahu hi Middle East policy chungchangah chuan Biden-a khingpui Republican Donald Trump lamṭang lian tak a ni.

Netanyahu-an Biden ten meeting an neih chungchang chu minute 26 dawn a sei a tarlangin, political issue hrang hrang an sawilang. Hei hi Israel news website lam chuan an ngaiven zui hle a, mi eng emaw zat chuan Netanyahu hi Biden-a nuihsawhah an puh a ni.

Kumin June thla khan Bennett kaihhruaina hnuaiah left-wing, centrist, right-wing leh Arab party ṭangrual chuan Netanyahu hi paihthlain Israel sorkar thar an din a, Israel rama rorelna chelh rei ber, kum 12 chhung conservative party thuneihna chu an titawp a ni.

Eptu lama awm mek Netanyahu chuan sorkarna siam tumin hma an la leh dawn tih a sawi.