Khawvel pumah hri kai mtd 50 chuang awm tawh
John Hopkins University-a Center for Systems Science and Engineering (CSSE) tarlan danin, khawvel pumah Covid-19 kai mi maktaduai 50 chuang an awm tawh.
Pathianni chhun thlenga hri kai hmuh chhuah tawh hi mi 5,00,52,204 an awm tawh a, an zinga 12,53,110 chuan an thihpui tawh a ni.
US chu hri kai tamna leh hri thihpui tamna ber ram a la ni chhunzawm zel a, hri kai hi 9,879,323 awm tawhin mi 237,192 in an thihpui tawh. US dawtah India chu hri kai tamna ber niin, Brazil chu hri kai tamna ram pathumna niin hri thihpui tam ber ram dawttu a ni bawk.
Ram hrang hrang zingah Covid-19 kai mi maktaduai khat chuang awmna te chu - Russia, France, Spain, Argentina, Britain leh Colombia an ni. US-a Texas state bikah pawh hri kai hmuh chhuah tawh hi maktaduai khat an tling tawh bawk. Hri pui vanga mi 40,000 chuang thi awm tawhna ram zingah India, Mexico, Britain, Italy leh France an tel bawk.
Khawvel puma hri kai hi Setpember 17 khan mi maktaduai 30 an ni a, October 19-ah mi maktaduai 40-ah kai chhoin, ni 32 chhungin mi maktaduai 10 in an kai belh hman. Hemi hnu hian ni 20 chhung lekin mi maktaduai 40 aṭangin maktaduai 50-ah hri kai hi an pung leh bawk a ni.
Hetih lai hian Covid-19 hri lo chhuahna, China-ah chuan hri leng hi khuahkhirh a ni tawh a, an ram National Health Commission-in a tarlan danin April thla aṭang khan an ramah hian hripui vanga thi report belh an la awm lo.