US House Speaker Paul Ryan-an chawlh a tum

US House of Representatives Speaker Paul Ryan chuan kumina inthlan neih tura chuh a tum tawh lo tih a sawi.

Congress-a roreltu chak ber zinga mi, Paul Ryan hian kumin November thlaa inthlan neih turah a bial Wisconcin-ah chuan term dang chelh leh tura chuh zui a tum tawh lo tih a sawi a ni. House member zinga Republican 30 dawn chuan chawlh an tum thu an lo sawi tawh a, hei vang hian lower chamber thunun zel turin an dinhmun a khirh phah dawn a ni. Democrats lam hian House-a roreltu ni tur hian seat 23 neih belh an mamawh dawn a ni.

Nilaini-a chanchin thar lakhawm­tute a kawmnaah Ryan chuan inthlan­a chuh a tum tawh loh thu hi sawiin, hei hi chhungkaw thil vang niin a sawi. A hna atan chuan theihtawp a chhuah thu leh, mawhphurhna sang tak a lak avanga inchhirna a neih ngai loh thu a sawi bawk.

Kum 48 mi, fa pathum nei Ryan chuan a chhungte tan hun a nei tawk lo nia sawiin, a fa ten kartawpa an hmuh theih chauh pa nih chu a duh lo tih a sawi. A term a tawp hunah nakkum January thla aṭangin a chawl tawh dawn a ni.

Ryan hi kum 2012-a US President thlanna neihah khan Republican vice presidential nominee a ni a, kum 2020 hnuah Republican president candidate tura beisei zingah a tel. Mahse Ryan chuan president hi chuh a tum lo tih a sawi.

CNN in a kawmnaah, Ryan chuan President Trump nen chuan mi in ang lo tak an nih thu a sawi a, an kum pawh a inthlauin an style pawh a inang lo a, an inkarah innghirnghona awm fo ṭhin mah se, duh thuhmun erawh an nei tih a sawi.

Kumin November thla hian House member 435 leh senator 34 thlan a ni dawn a, hei hian Congress-a Republican lamin thuneihna an neih chhunzawm theih dawn leh dawn lo pawh a hril dawn a ni. Ryan hian a bial Wisconsin-a chuh zui a tum loh thu a sawi avangin he bial hi Democrats lamin an lak a rinawm thu zirchiangtute chuan an sawi.