Britain PM-in emergency cabinet meeting a ko

Britain Prime Minister Theresa May-i chuan Syria sipaiten beihpui an thlaknaah tur hlauhawm, chemical ralthuam an hmang nia sawi a nih chungchang ngaihtuah turin nimin khan emergency cabinet meeting a ko.

US President Donald Trump chuan Nilaini khan Syria chu sipai chakna hmanga beih letah a vau tawh a, hemi rual hian Syria President Bashar al-Assad thlawptu Russia pawh a bei tel nghal bawk.

Therasa May-i thupuangtu chuan nimina meeting-ah hian Syria chungchang bik ngaihtuah a ni dawn tih a sawi a, May-i hian US kaihhruaia hma laknaa tel pawh a inpeih niin a sawi. Chanchinbu ṭhenkhat chuan May-i hian British submarine-te chu missile hmanga Syria ram an kahphakna tur hmunah insawn turin a hrilh tawh niin an sawi bawk.

May-i hian US kaihhruaia sipai chakna hmanga hma lakna tura Britain a tel ve duh leh duh loh chungchangah a minister-te ngaihdan a zawt dawn a ni. PM hian hemi chungchangah hian parliament pawmpuina a lak kher a ngai dawn lo a ni. Mahse eptu pawl Labour Party hruaitu Jeremy Corbyn chuan May-in sipai kaihhnawih thila thutlukna a siam tum hi parliament-a ngaihtuah a duh thu a sawi.