Algeria sipai thlawhtheihna tlaah mi 257 thi

Algeria khawpui, Algiers bulah Nilaini khan sipai thlawhtheihna a tla a, mi 257 an thi.

Thlawhtheihna hi Agiers leh Blida khawpui inkara Boufarik air base aṭanga a thlawh chhuah hnu reiloteah a tla a ni. Thlawhtheihna tlaa thi zingah hian thawktu mi 10 an tel.

Defence Ministry thuchhuah chuan thlawhtheihna hi Boufarid aṭangin Tindouf a pan a, hemi hnuah Bashar lam pan leh tur a ni tih a sawi. Heng khuate hi Algeria-Morocco ramri bula awm an ni.

Thlawhtheihnaa chuang tam zawk hi sipaite leh an chhungte niin an sawi a, a chetsual dan hi chhui chian­ a nih tur thu a sawi. Thlawhtheihna hi Soviet-designed Ilyushin Il-76 a ni. He chetsualna thleng hi kum 2014, July thlaa Ukraine khaw­chhak lama mi 298 chuanna, Malaysia Airlines flight MH17 kahthlak a nih a, thlawhtheihnaa chuangte an thih vek hnua thlawhtheihna chetsualna thleng leh rapthlak ber a ni.

Nilaini vek khan Russia khawchhak lam, Khabarovsk-ah helicopter a tla a, mi paruk an thi. Mi-8 helicopter hi Vostok airline ta niin, an ram huna chawhma dar 11:30 velah a tla a ni. Vostok airlines chuan helicopter hi training flight nei lai a nih thu leh, a chuangte pawh thawktu vek an nih thu a sawi. a chetsual chhan hi hriatchian a la ni lo a, chhui chian mek a ni.