Ethiopia PM-in sipai hotu lu ber a ban

Ethiopia prime minister Abiy Ahmed chuan an ram hmarlam, Tigray biala sipaiten beihpui an thlak mek laiin, Pathianni khan sipai hotu lu, intelligence hotu leh foreign minister-te a ban. 

PM office chuan top official-te ban an nih thu hi Twitter-ah a tarlang a, ban a nihna chhan erawh a sawi­lang lo. Hetih lai hian Tigray biala Tigray People’s Liberation Front (TPLF) leh sipaite inbeihna thlengah hian sipai eng emaw zatin hliam an tuar tawh nia sawi a ni. 

Deputy prime minister Demeke Mekonnen chu foreign minister atan ruatin, deputy army chief Birhnau Jula chu army chief of staff-ah dah  nghal a ni. Amhara region president Temegen Tiruneh pawh intelligence chief atan dah nghal a ni bawk. 

United Nations chuan Tigray biala buaina thleng vang hian mi maktaduai kua dawn chu dinhmun hlauhawmah an awm niin a sawi a, November 4-a Ethiopia sorkarin Tigray-a state of emergency a puan avangin ei tur leh chhawmdawlna dang lakluh kawngah pawh harsatna an tawh thu a sawi. 

Tigray region-a chief administrator Debretsion Gebremichael chuan Novem­ber 5 khan an sipaite chuan Ethiopian Military Northern Command head­quarters-a ralthuam eng emaw zat an lak thu a sawi.  Hei vang hian November 6 khan PM Ahmed chuan Tigray region-a hmun ṭhenkhatah sipai­ten beihpui an thlak tur thu hi a puang a ni. Sipaiten beihpui an thlaknaah Pathianni khan Tigray region khawpui, Mekelle-a airprot bula missile leh artillery site chu an bomb a ni. 

Ethiopia ramah Tigray bial hi a hausa a, kum 2018-a Abiy Ahmed a PM hma kha chuan Ethiopia politics chu Tigray bial miten hian an awp a ni. PM Ahmed hian Ethiopia ram inrelbawlna kawnga Tigray bial thuneihna chu tihtlem tumina  bei a, hi anni lam hian duh loin an bei let ve thung a ni.