Canada inthlanpuiah PM Trudeau-a party-in hnehna chang

Canada ram inthlanpui, September 20-a neihah prime minister Justin Trudeau kaihhruai Liberal Party chuan hnehna an chang leh a, mahse party mala majority an neih phak loh avangin party dang an thawhpui a ngai leh dawn a ni.

Kum 49 mi, Trudeau hi kum 2015 khan a ṭum khatna atan Canada Prime Minister niin, kum 2019 khan minority sorkar a siam leh a, a term thumna atan PM a ni leh thei dawn a ni.

Liberal Party hian House of Commons-a seat 338 aṭangin seat 156 an la a, Conservative Party-in seat 121 , Bloc Quebecois-in seat 32, New Democratic Party-in seat 27 leh Green Party-in seat hnih an la.

Party hrang hrangte seat neih zat hi House of Commons an ṭhiah taka an seat neih zat nen khan a danglamna a tlem hle.

House-ah hian seat 338 a awm a, sorkarna siam turin seat 170 tal an lak tlin a ngai a ni. Liberals hian a hma khan seat 155 an nei a, Conservative Party-in dawtin seat 119, Bloc Quebecois-in seat 32 , New Democratic Party-in seat 24 leh Green Party-in seat hnih an nei a ni.

Canada ramin Covid-19 hri leng thawh lina an tawrh mek karah PM Trudeau-a'n inthlanpui neih hun hma kum hniha inthlan a buatsaih chu eptu lamin an sawisel nasa hle. Trudeau hian a kaihhruai ṭangrual sorkarin kum hnih chauh a hmang zo tihah, August 15 khan inthlan neih a nih tur thu hi a puang a ni. Trudeau chuan inthlanna chu Canada mipuite aw an hriat hun leh Covid-19 vanga an buaina aṭanga chhanchhuak tura an duhte an thlan chhuah hun, ramin rahbi thar an kai theih hun anih thu a sawi.

Mahse eptu lam chuan Trudeau thiltih dan chu majority sorkar din a duh vang a nih thu an sawi thung a, mahse inthlanah hian Trudeau-a party hian majority an nei pha ta chuang lo a ni.

Hri leng kara inthlan huaihawt a nih vangin a hautak a, an ram inthlan neih tawha hautak ber niin USD matkaduai 470 vel an seng nia sawi a ni bawk.

John Hopkins University-in a tarlan danin, Canada-ah hian Covid-19 hri kai hmuh chhuah hi mi maktaduai 1.56 chuang awm tawhin, an zinga 27,300 in an thihpui tawh bawk.