Italy-in Covid vaccine dose thumna sem chhuak ṭan

Italy sorkar chuan an ram damdawi lama thuneitu sang, Medicines Agency (AIFA) hnen aṭanga phalna an hmuh hnuah Thawhṭanni aṭang khan Covid-19 vaccine dose thumna an semchhuak leh ṭan.

Health Ministry-in thla tir lama a lo puan lawk tawh angin, vaccine dose thumna hi taksa hriselna lama pan leh natna benvawn nei te hnenah Pfizer-BioNTech emaw Moderna vaccine emaw zawk an pechhuak a ni.

Vaccine an pekchhuah tur zingah hian taksa peng thlak tawh, transplant patients bakah kum upa leh care home-a awm te chu ngaihpawimawh hmasak an ni ang. AIFA in kaihhruaina an tihchhuah angin, healthcare worker-te pawh pek hmasak tur zingah hian an tel bawk.

Vaccine dose thumna hi duhthlan theiha siam a ni dawn a, vaccine la vek turin sorkar chuan ngen mah se lak ngei ngei tur tih dan a awm chuang lo a ni.

AIFA chuan taksa lama chak lo ten an lak zawh aṭanga ni 28 hnu velah dose thumna hi mi nawlpui tan lak theih a nih tur thu an sawi.

Kum 80 chunglam, care home-a chengte leh healthcare professional-te tan chuan an taksaa natna dotu tichaktu, booster dose ang a nih thu leh dose hnihna an lak aṭanga thla ruk hnuah lak tur a ni.

AIFA leh Health Ministry-te chuan an ram thupui ber chu ram mipui tam thei ang ber hnena vaccine pekchhuah a nih thu an sawi.

Thawhṭanni thleng khan (kum 12 leh a chunglam) zinga 76% ten Covid vaccine bikimin an la tawh a, 82% te chuan dose khatna an la tawh bawk tih Health Ministry data chuan a tarlang.

Italy-ah kum 2020, February thlaah hripui hi a leng ṭan a, hripui len tirh aṭangin coronavirus kai hmuhchhuah hi maktaduai 4.6 vel an awm tawh. Hri vanga thi 1,30,000 leh enkawl dam tawh maktaduai 4.4 vel an awm tawh bawk.