Germany-in kum 2022-ah naupang tan Covid vaccine sem chhuak dawn

Germany chuan kum 2022 kumtir lamah naupang kum 12 chin tan Covid-19 a pechhuah ṭan dawn tih Federal Minister of Health Jens Spahn chuan Thawhṭanni khan a sawi.

Spahn chuan nakkum kumtir lamah naupang tana vaccine an pekchhuah dan kimchang an tarlan tur thu a sawi a, "Naupang zawkte kan venhim ṭhat theih zawkna tur a ni," a ti.

Thawhṭanni thleng khan, German mi maktaduai 52.5 chuangin vaccine dose kimin an la tawh a, ram mipui cheng zat aṭanga 63.1% an nih thu Robert Koch Institute (RKI) for infectious diseases chuan a tarlang. Mi maktaduai 56 dawnin vaccine dose khatna hi an la tawh bawk a ni.

Tun thla tir lam khan, German siam Covid-19 vaccine BioNTech chuan naupang kum 5-11 inkar tana pekchhuah phalna pawh an dil tih an sawi. Heng naupang ten an lak tur hi vaccine dose pangngai an lak ṭhin aiin a bur a te hret a ni.

Ni ruk chhung hri kai an tlakhniam hnuah tunhnai ni sarih chhung khan Germany-ah Covid-19 kai an pung thar leh a, Thawhṭanni khan mi 10,000 aṭanga 71.0 zelin hri an kai nia chhinchhiah niin, a hma niah 70.5 niin kar liam ta khan 81.9 an ni tih RKI chuan a puang.

Thawhṭannia hri kai thar hmuhchhuah hi 3,736 an awm leh a ni.