Notre-Dame sak ṭhat hna ṭan thei dawn hnai

Kum hnih chuang liam taa kangmei chhuakin a tihchhiat, Paris khawpuia Notre-Dame Cathedral sak ṭhat hna chu an thawk ṭan thuai dawn tih official-te chuan an sawi.

Kum zabi 12 hunlaia sak, France ram leh Paris khawpuiin an hmingthanpui, kumtin khawvel ram hrang hrang aṭanga tlawhtu mi nuai tel nei ṭhin, Notre-Dame cathedral hi kum 2019, April thlaa kangmei chhuak vangin a kang chhe nual a ni. France President Emmaneuel Macron chuan he cathedral hi sak ṭhat leh a tiam nghal a, kum 2024-a France-in Olympic Games a thlen hunah hawn leh hman ngei a nih tur thu an ram mipuite hnenah a lo tiam tawh a ni.

Kangmeiin a tihchhiat hrang hrangte siam ṭhat dan ngaihtuah hian hma lak nghal a ni a, a siam ṭhat hna thawktu turte pawhin President-in a lo tiam tawh angin, a duh hunah hawn leh hman ngei an tum tih an sawi.

Cathedral hi a design hmasa ang bawka siam ṭhat leh a ni dawn a, kum 1800 laihawl vela architect Eugene Viollet-le-Duc design, meter 96-a sang spire pawh a design ang chiah hian siam lehin, a siamna tur thing pawh thlan a ni tawh tih an sawi a ni. Siam ṭhat hna thawktu tur company thlan fel a nih veleh hna hi thawh ṭan nghal a ni ang. Hnathawh ṭan hma, tun thla chhung hian building chhung lam bang leh chhuatte chu tihfai vek phawt a ni ang.

Notre Dame-a kangmei chhuak hian France chauh ni lo, khawvel a ṭhawng hle. Kangmei hi cathedral attic aṭanga chhuakin, inchung leh spire te a kang tel a ni. Uitu an tam a, sak ṭhat a nih leh thuai theihna atan France mi hausaten sum tam tak an thawhkhawm nghal bakah, khawvel hmun hrang hrang aṭang pawhin donation an hmu hnem hle.

Cathedral-a kangmei a chhuah dan hi investigator-te chuan tun t hlengin an la sawi chiang lo a, mahse thil pahnih - spire bula short-circuit vang emaw, cigarette bung an chhar avanga hetih hunlaia chei ṭhat hna thawktute inthlahdah vang emaw a ni thei em tih an thlurbing a ni. Kangmei chhuak hian rang taka hmun dang a kankai avangin Notre Dame safety planner-te pawhin sawisel an hlawh phah hle bawk a ni.