Guinness World Records ; Japanese unau, khawvela phir upa ber

Guinness World Records chuan Japanese phir, hmeichhia ve vete chu khawvela phir upa berah an puang.

Phir-te hi Umeno Sumiyama leh Koume Kodama-te niin kum 107 leh ni 300-a upa an ni a, Japanese phir hmeichhe unau tho- Kin Narita leh Gin Kanie-te record lo siam tawh chu an khum a ni. Umeno leh Koume-te hi November 5, 1913 khan Shodoshima thlirkarah an piang a, November 5 hian kum 108 an tling tawh dawn.

Thawṭanni khan Guiness World Record chuan Umeno leh Koume-te record hi puangin, Japan rama an Aged Day-ah chiah an puang chhuak nghe nghe.

Umeno leh Koume-te hi hmun khatah an khawsa loa, chumi avang chuan anmahni enkawltute hnenah ve ve a hrangin certificate pawh an thawn. Guiness chuan Thawhṭannia thuchhuah an siamah Japanese phir-te hi September 1 khan record thar vawngtuah hian chhinchhiah an ni tih an tarlang.

Record hmasa chelhtu Kin leh Gin-te kha kum 107 leh ni 175-a upa an ni a, January 2000 khan Kin chu thiin Gin chu kum 108 mi niin kum 2001 khan a thi thung.

Kin leh Gin chu 'Rangkachak' leh 'Silver' tihna a ni a, August 1, 1892-ah Nagoya-ah an piang a ni. An hun hnuhnung lamah khan khawvelin a ngaihven hle a, media lamah pawh an lang ngun hle.

Tuna record thar chelhtu pakhat zawk Umeno hian fa pali a nei a, Koume chuan pathum a nei thung.

Japan hi khawvela 'life expectancy' sanna ber ram a ni a, Guiness-in a chhinchhiah zinga khawvela dam rei ber record neitu pawh Japan mi tho niin, Kane Tanaka a ni a, kum 118 zet a ni tawh.