Science & Environment ; NASA-in Thlaa vur zawng tur rover ṭumna tur tichiang

US space agency National Aeronautics and Space Administration (NASA) chuan Thawhṭanni khan thuchhuah siamin Thlaa vur (ice) zawng tur rover ṭumna chu an tichiang tawh tih an tarlang a, Thla chhim tawp (south pole)- Nobile Crater-ah an ṭumtir dawn.

NASA hian an rover hi kum 2023-ah an thawn chho dawn a, an robot hmang chuan Thlaah tui khang (water ice) a awm ngei a ni tih an finfiah theih an beisei thu an sawi a, chumi hmang chuan engtikah emaw chuan rocket fuel an la siam theih an beisei thu sawiin, chu chu Mars leh van thengreng zau zawk zirchianna atana ṭangkai taka an hman theih an beisei bawk.

NASA planetary science division director Lori Glaze chuan,"Nobile Crater chu 'crater' pakhat, Thla south pole bula mi niin celestial body te zawk nena an insutna aṭanga lo awm a ni," tia sawiin an rover thawn chhoh chuan Thla leilung chu a zirchian mai dawn bakah feet engmaw zat chu a verh hial dawn tih a sawi a ni.

Rover an thawn chhohna tur hi kan Solar System-ah chuan hmun vawt ber zinga mi a ni a, ralkhat aṭang bakin chiang taka zir a la ni loa, NASA Lunar Reconnaissance Orbiter leh Lunar Crater Observation bakah Sensing Satellite hmang chauhin an la enfiah a ni.

Robot an tirh tur hi Volatiles Investigating Polar Exploration Rover (VIPER) tih a ni dawn a, golf cart tiat vel a ni dawn.

Sikeisen (Mars) lama an rover thawn chhoh tur ang lo taki VIPER hi chu thunun a awlsam zawk dawn a, thupek pek hun chiah deuhthawah a che dawn a, hei hi Sikeisen aia Thla a hnaih zawk daih vang a ni.

VIPER hi 0.5 mph vela chakin a che thei a, battery darkar 50 daih, solar hmang a ni dawn bawk. Chakai angin a sir zawngin a kal thei dawn a, charge-a ngaih hunah chuan Ni lam a hawi mai dawn a ni.

VIPER enkawltu team-te chuan Thlaah khian engtin nge tui khang a awm theih tih chu hriat an tum dawn a, kum tluklehdingawn tam tak chhungin engtin nge a tuiral loh theih tih leh tunah hian tui chu khawiah nge a awm tak tihte hriat an tum dawn.