Dubai-ah Middle East Expo 2020 nei dawn

Middle East-a world fair neih hmasa ber tur, Expo 2020 Dubai chu Covid-19 hri leng vanga kum khat chhung tihkhawtlai a nih hnuah, October 1 aṭangin neih a ni dawn ta.

Expo 2020 hi Dubai-a neih tur kum 2015-ah Milan, Italy-a neih a nih ṭum khan thlan a lo ni tawh a, hetihlaia expo neihna tur hmun square km 4.3 biala zau hi thlaler ringawt a la ni. Mahse UAE sorkar chuan USD tluklehdingawn 6.8 sengin a chei a, expo ropui tak neihna tur hian a peihfel tawh a ni.

Ram hrang hrangte hri leng vangin khuahkhirhna ṭhenkhatte la kalpui mah se, Dubai chuan Expo chhimtu hi mi maktaduai 25 vel an awm a beisei tho a ni. Kum 18 chunglamte chuan Covid-19 negative certificate emaw, vaccine an la tawh tih fiahna emaw an neih a ngai dawn thung.

Hetih lai hian ram pangate chuan boruak awmdan thlirin an ram pavilion target erawh an tihniam leh a, ram hrang hrangte intlawhpawhna kawngah boruak a la pangngai theih loh avangin an beisei an phak theih loh an ring a ni.

Ticket pawh hralhchhuah a ni ṭan tawh a, ṭum danga Expo neih angin hralh chak theih loh mah se a lawmawm thawhkhat hle niin a buaipuitute chuan an sawi. Expo-a event tam tak chu live-stream an ni ang.

Dubai chuan he expo hi 'Connecting Minds and Creating the Future' hnuaiah culture, technology leh architecture phochhuahna a nih rualin climate change, conflict leh economic growth chungchangte a leng vek dawn tih a sawi. France Expo commissioner-general Erik Linquier chaun sumdawnna lama ram lian leh thiltitheite chuan Expo hi world market-a an dinhmun siamṭhatna atan an hmang dawn a ni, a ti.

Hetih lai hian sawiseltu pawh an awm ve leh reng tho a, European Parliament chuan an member ramte leh company-te chu UAE human rights record ṭhat loh avangin an lawm lohna lantirna atan Expo hi boycott turin a lo ngen tawh thung.