Netherlands-in Holocaust monument hmasa ber hawng

Netherlands ram chuan Indopui II hunlaia German Nazi-te kuta Juda mite hriatrengna, an rama an siam chu an hawng.

Amsterdam-a Holocaust monu-ment-ah hian The Netherlands khua leh tui, Juda mi thite hming 102,163 ziahlanna chu an ram lal, King Willem-Alexander-a'n a hawng a ni.

He monument hi kum 75 mi, Daniel Libekind-a design a ni a, Amsterdam khawpui laili lai takah brick hmanga rem kual a ni a, chung lam aṭanga enin Hebrai ṭawngin 'hriatrengna' tih a inziak a ni.

Lung rem tinah Netherlands aṭanga an hruaichhuah hnua Nazi concenctration camp-a an tihhlum takte hming dah a ni. Indopui II hunlai hian Netherlands-a cheng Juda mi tam zawk chu hruaichhuah an ni. Juda mite bakah Roma leh Sinti mi eng emaw zat tihhlum an ni tel bawk.

Prime minister Mark Rutte chuan, "Kan ram chanchina hun thim lai ber zinga mi a ni. Hetiang thil a thlen nawn tawh lohna turin eng angin nge kan inven ang a, nasa zawkin engtinnge hma kan lak ang tih zawhna pawh a piang a ni," a ti.

He hriatrengna hmun siam tur hi a hmun tur chungchangah inhnialna a awm avangin kum eng emaw zat tihkhawtlai a nih phah a ni. A siamna senso, USD maktaduai 17.4 hi mimal, Amsterdam leh municipality dangten an thawhkhawm a ni.