Sri Lanka President-in parliament titawp

Sri Lanka President Maithripala Sirisena chuan May 8 thleng atan Parliament a titawp lailawk a, hei hi a kaihhruai ṭangrual sorkar siamtute inkarah khi a awm vang nia sawi a ni.

Kar hmasa khan Prime Minister Ranil Wickremesinghe rin tawk lohna motion chu Parliament-ah put luh a ni tawh a, mahse PM hian fiahna hi a paltlang a ni. Hemi hnu hian sorkar chuan cabinet siksawi a nih tur thu a sawi a, siksawi a nih hmain President Sirisena chuan Parliament hi a titawp ta a ni.

President secretary, Austin Fernando chuan May 8 thleng atan Parliament chu tihtawp a nih thu sawiin, he thutlukna siam a nih chhan erawh a sawilang lo. A hmaa ruahmanna siamah chuan May 8 hma hian Parliament ṭhutkhawm ṭum khatna neih tur niin, Apri 23-ah cabinet thar lakluh tura tih a ni.

Senior minister chuan Parliament tihtawp a nih vang hian May 8 hnua Parliament din thar a nih leh hunah committee pawh ruat thar leh vek a ngai dawn niin a sawi. Parliament committee ṭhenkhat, pubic enterprise leh account chungchang buaipuitu chu eptu member-ten an kaihruai mek.

PM Wickremesinghe hi bond market-a sum tihchingpen leh thla hmasaa Muslim-te laka tharum thawhna thleng chungchang dang zo loah puhin a lakah rin tawk lohna motion hi eptuten an pulut a ni. President Sirisena-a party, Sri Lanka Freedom Party (SLFP) member 16 chuan no-confidence motion thlawp lamah an vote a, an zinga a tam zawk chu minister an ni. Hemi hnu hian minister an nihna aṭanga bangin, eptu lamah an awm zui a, hei vang hian SLFP leh Wickeremesinghe-a party, United National Party (UNP) thawhdunna pawh a chhe chho hle nia sawi a ni.