Rohingya-te hruai kir thuai dawn - Myanmar minister

Myanmar minister chuan sipaiten Rakhine state-a beihpui an thlak avanga Bangladesh-a Rohingya Muslim tlanchhiate hruai kir hna chu kalpui a ni thuai dawn tih a sawi.

United Nations-in a chhut danin, nikum August 25 aṭanga Rakhine state-a beihpui thlak vang hian Rohingya mi nuai ruk chuang chu Bangladesh-ah an lut a ni. Myanmar chuan Rohingya-te hi a khua leh tui dik tak angin a pawm lo a, Bangladesh aṭanga dan loa pem lut angah a ngai a ni.

Myanmar minister for Social Welfare, Relief and Resettlement Win Myat Aye chu Ningani khan Bangladesh-ah zinin Cox Bazar-a Rohingya camp a tlawh a, raltlan aiawh mi 50-te a kawm bawk.

Bangladesh foreign minister AH Mahmod Ali nen Dhaka-a meeting an neihah, Aye chuan harsatna hrang hrang awmte pawh an chingfel tawh tih sawiin, Rohingya-te hruai kir hna chu kalpui thuai a nih tawh a beisei thu a sawi. Meeting-ah hian Bangladesh Home Minister Asaduzzaman Khan Kamal bakah ram pahnih official-te pawh an tel.

Aye-a chuan Raohingya-te hruai kir an nih theihna atan hian Bangladesh sorkar nen chuan theihtawp an chhuah dun zel thu a sawi a, UN refugee agency-te pawh a sawipui tawh niin a sawi. Aye chuan Myanmar rama Rohingya kir lehte chu Myanmar ram dan anga khua leh tui nihna pek an nih tur thu a sawi bawk.