UN General Assembly session neih mek a ni

United Nations General Assembly (UNGA) session vawi 76-na chu Thawhlehni aṭang khan New York-a UN headquarters-ah neih mek a ni a, September 27 thleng a awh ang.

Kumina UNGA-ah hian climate change, Covid-19 leh security chungchang chu sawiho langsar zualte an ni. Session ṭan ni hian hruaitu eng emaw zatin thu an sawi a, an zingah hian UN secretary-general Antonio Guterrres, US president Joe Biden, China president Xi Jinping leh Iran president Ebrahim Raisi-te an tel.

UNGA session vawi 76-na hi September 14 khan hawn a lo ni tawh a, hemi ni hian Maldives hruaitu Abdulla Shahid chu General Assembly President atan lakluh a ni. Thawhlehni aṭanga neih ṭan, General Debate pawh hi GA President hian a kaihruai a ni. General Debate chhung hian ram leh sorkar hruaitu 100 velin thu an sawi dawn a ni.

UN secretary-general Guterres chuan Covid hri leng mekah khawvel ram hrang hrangte chu ṭangrual a, thawkho ṭha turin a ngen. "Hun thim tak kan hmachhawn mek laiin, kawng dik lo lamah kan kal mek a ni. Kan dinhmun a ṭhat loh hle laiin kan inlungrual lo hle a ni," tiin Covid vaccine chungchanga intluktlan lohna nasa tak te; Afghanistan, Ethiopia leh Yemen-a tualchhung buaina te, thu dik tawk lo thehdarhin khawtlang a tihbuai dante, human righst palzut a nih dan leh economic lifeline chungchangte a sawi.

Taliban-in thusawi ve dil, UN palai ruat thar
Afghanistan-a roreltu, Taliban chuan UN General Assembly-a thu sawi ve an dil. UN committee chuan an dilna hi a ngaihtuah dawn a,an phalsak a nih pawhin tun ṭum session-ah chuan an sawi hman a rinawm loh thung.

Taliban-te hian thuneihna an chan hnuah August thla khan UN-a Afghanistan ambassador Ghulam Isacza chu an ram aiawhtu a ni tawh lo tih an sawi a, amah thlaktu atan hian Suhail Shaheen chu an nominate nghal a ni. Mahse session tawp hmain committee hi an ṭhutkhawm hman dawn loh avangin kar leh Thawhṭannia Afghanistan aiawha thu sawi tur pawhin Ghulam Isacza tho hi a din a ngai dawn a ni.