US-in Afghan raltlante tan USD tld 6.3 ruahman

United States (US) sorkarin Afghanistan-a Taliban-ten thuneihna an chan hnua US-a tlanchhia, Afghan mite ṭanpui leh inbelna atana USD tluklehdingawn 6.3 a ruahman chu US House of Representativs chuan a pawm.

Afghan raltlante ṭan­puina sum ruahman hi sorkarin disaster relief leh stopgap atan an ruahman USD tluklehdingawn 28.6 zinga mi niin, House-ah tlang mah se Senate-ah erawh an sawiho leh phawt a ngai dawn a ni. He fund hmang hian Afghan raltlante US-a him tak leh zalen taka an khawsak theihna tura puitu agency-te mamawh chu pek a ni thei dawn a ni, tiin House-a Democrat representative Deborah Rose chuan a sawi.

US-ah hian Afgha­nistan-a Taliban-ten thuneihna an chan hnuah mi tam tak chu US-ah an raltlan tawh a, an zingah hian kum 20 zet Afghanistan-a America sipaite an awm laia lo puitu leh ṭawng lettu atana an hmante an tel.

Republican member tam zawk pawhin Afghan raltlante puihna tur siam hi an thlawp rualin, fund tam zawh dah tum erawh chu leiba tam zawk insiamna tur a nih avangin Senate lamah chuan a lo sawi buai rin a ni. Republican-te hian Afghanistan aṭanga US sipaite lakchhuah an nih danah President Joe Biden chu an sawisel nasa a, President thiltih dan chu a pawlawh lutuk niin an ngai. "America mite chuan a thutlukna siam dan hi an hriatchian ngei a ngai a, kawng hrang hrangah ram hruaitu a nihna anga a hlawhchham zia pawh a lang tawh a ni," an ti.

Afghanistan aṭanga US sipaite lakchhuah fel an nih hma lawk khan Kabul airport luhna bula thihchilh bomb tihpuah vangin Afghanistan mi 175 bakah US sipai 13 in nunna an chan a ni.