China-in ram danga coal project a puihna titawp dawn

China president Xi Jinping chuan ram danga coal-fired power project thawhna tura an puihna ṭhin chu a titawp tawh dawn tih a sawi.

China hian developing ram hrang hrang, a bikin Indonesia leh Bangaldesh ramah coal proejct hi sum tam takin a pui ṭhin a ni. Mahse hengte hi a titawp vek tawh dawn tih a sawi. Kumin kumtir lam khan South Korea leh Japan ram pawhin coal project an puih ṭhin hi an titawp dawn tih an lo sawi tawh bawk.

President Xi hian project puihna an tihtawpna chhan tur hi kimchangin sawi lang lo mah se, US climate envoy John Kerry chuan thil lawmawm tak a nih thu a sawi a, carbon emission titawp tura hmalakna pawimawh tak a ni tih a sawi. "China hi hun eng emaw chen hemi chungchang hi kan lo sawipui tawh ṭhin a, President Xi-a'n he thutlukna a siam ta hi a lawmawm hle a ni," a ti.

Kum 2013-2019 chhung khan China hian an ram pawn lama coal-fired power project 13 chu sumin a lo pui ṭhin a, coal project puitu lian ber a ni ṭhin. Paris climate agreement ziah a nih hnuah China sorkar hnuai Bank of China chuan heng project puihna atan hian USD tluklehdingawn 35 zet a pe hman a ni.