Rohingya raltlante ṭanpuinan US-in USD mtd 180 pe dawn

United States chuan Myanmar aṭanga Rohingya raltlan 7,00,000 chuang ṭanpuina turin USD maktaduai 180 a pe dawn.

US State Department thupuangtu Ned Price chuan United Nations-a US Ambassador Linda Thomas-Greenfield chuan Myanmar, Bangladesh leh a chheh vel ram buaina awm vanga Rohingya raltante ṭanpuina turin USD maktaduai 180 an pe dawn tih a puan thu hi a sawi a ni.

Price chuan Nilaini khan thuchhuah siamin, "Kum 2017, August thlaa Myamnar-a Rakhine state-a beih leh tihnawmnah an tawh vanga tlanchhia, Rohingya raltlante ṭanpuina tura sum kan pek belh leh tur nen hian, heng mite chhawmdawlna tur hian USD tluklehdingawn 1.5 chuang kan pe tawh a ni," a ti.

Myanmar sipaite beihpui thlakna avangin Rakhine state aṭang hian Rohingya mi nuai tel chu Bangladesh ramah an tlanchhia a, Bangladesh-a Cox Bazar-ah a tam zawk chu an la khawsa mek a ni.

Kumin February 1 khan senior general Min Aung Hlaing kaihhruaiin sipaite chuan Myanmar civil sorkar thuneihna chu an hnehchhuh bawk a, ram pumah kum khat chhung atan state of emergency an puang zui nghal bawk. Hmun tam takah mipuite chuan sipai sorkar duh lohna an lantir a, sipaite nen inbeiin sipai kut tuara thi pawh eng maw zat an awm tawh bawk.

US state department chuan Myanmar sipaite chu tharum thawhna thleng ṭhinte titawp nghal tur leh dik lo taka an mante chu chhuah nghal turin a ngen a, Myanmar rama mipui rorelna tungding a, ASEAN nena inremna an lo siam tawh, Five Point Consensus chu ngai pawimawh turin a ngen bawk.

"Ram roreltute chu mipuite chhawmdawlna tur thawnluh phalsak a, Covid-19 dona kawnga mamawhte semchhuak turin kan ngei a ni," tiin State department thupuangtu chuan a sawi.