Air pollution vangin kumtin mi mtd 7 dawn thi ziah : WHO
World Health Organisation (WHO) chuan khawvel boruak bawlhhlawh, air pollution chu mihringte hriselna atana thil hlauhawm ber zinga mi a ni tiin, kumtinin khawvel pumah air pollution vang hian mi maktaduai sarih dawn an thi ziah niin a sawi.
UN health agency chuan, "Air pollution hi climate change ang bawkin mihring hriselna tiderthawng thil hlauhawm tak zinga mi a ni. Air quality tihṭhat hian climate change thlengin nghawng ṭha a nei a, gas tihchhuah ṭhin hi kan tihtlem chuan air quality pawh a ṭha ve nghal dawn a ni," a ti.
WHO chuan air pollution vang hian kumtinin an thih hun aia hmaah mi maktaduai sarih vel an thih phah a, mi tam tak hriselna pawh a tichhia a ni. Naupangah pawh an chuap hnathawh a tichak lo a, thawk lama harsatna neiin asthma-te an neih phah thei bawk a ni, tiin a sawi. Pawn lam boruak bawlhhlawh hip luh nasat avangin puitlingah pawh heart disease leh stroke-te chu a thlen fo a, hei bakah hian diabetes leh neurodegenerative pawh a nghawng tel bawk tih a tarlang.
Kum 2005 hnuah a ṭum khatna atan WHO chuan air quality guidelines a tichhuak thar leh bawk a, he kaihhruaina thar hmang hian air pollution lak aṭangin mi tam tak nunna an chhanhim theih an beisei thu WHO chuan a tarlang.