Kabul University VC thlak vangin zirtirtu 70 in banna thehlut

Afghanistan-a Kabul University-a teaching staff 70, assistant professor leh professor-te chu Taliban sorkarin University Vice-Chancellor nilai, PhD holder Muhammad Osman Baburi ban a, a aiah BA degree holder Muhammad Ashraf Ghairat a dah avanga lungawi loin an bang.

Kabul-a university lian ber-a Vice-Chancellor atana Ashraf Ghairat dah a nih chungchang hi social media lamah pawh sawiselna a tam hle. Sawiseltute chuan nikuma Ghairat-a'n journalist thah an nih chungchangah a thattute thiam a chantirna thu a ziakte pawh an pho chhuak thar leh a ni.

Univeristy VC atana PhD holder, thiamna leh tawnhriat nei ṭha tak thlaktu atana BA degree holder ruat a ni chu Taliban member zingah pawh sawiseltu an awm a, ani aia he dinhmun chelh tlak leh thiamna nei mi tam tak an awm a ni, an ti.

Ashraf Ghairat hi sorkar hmasaah khan Minitsry of Education hnuaiah thawkin, Afghanistan chhimthlang lama IEA university assessment body hotuah a awm a ni.

Taliban sorkar hian kar tir lam khan sorkar university, Afghanistan president hlui leh Afghanistan-a political party lian ber pahnihna hmuchhuaktu, kum 2019-a a chenna ina misualte'na an thah tak - Burhanuddin Rabbani hming chawia phuah chu Kabul Education University tiin a hming a thlak. He university hi kum 2011-a a ina thah a nih hnuah khan Burhanuddin Rabbani hming hi chawi tir a ni.

Ministry of Higher Education chuan thuchhuah an siamah, university-te chu Afghanistan ram tana thiamna pawk chhuahna hmun hlu tak a ni a, political leh hnam bil hruaitute hming chawitir an ni tur a ni lo, a ti