UN official-in Myanmar tan a tlai hmaa hma la turin ngen

United Nations High Commissioner for Human Rights, Michelle Bachelet chuan Myanmar-a sipai rorelna hnuaiah mihring dikna chanvote palzut a ni nasain dinhmun ṭha lo takah an awm mek a, boruak ṭha lo zawk a thlen zel lohna turin a tlai hma ngeia hma la turin ram hrang hrangte a ngen.

Myanmar ram mipuite an tawrhna chu a nasa tawh hle tih sawiin, Bachelet chuan a tlai hma ngeia demo­cracy tundin a nih leh theihna atan leh, tawrhna nasa zawk an tawh lohna turin hma lak a tum tawh hle tih a sawi.

Kumin February 1-a Myanmar sipaiten civil sorkar thuneihna an hnehchhuh hnuah, sipai sorkar duh lohna lantira nawrh huaihawtte zinga mi 1,120 chu sipaite kut tuarin an thi tawh a, mi sang tel man an ni tawh tih UN chuan a tarlang.

Tun thlengin hun tam takah sipaite leh eptute inbeihna hi a la thleng reng a, civil mi tam tak chu himna zawngin an ram ṭhenawmah an tlanchhe tawh bawk.

Ningani khan Sagaing Region-a thingtlang khaw pakhat-a chenna inte chu sipaiten halsakin, tualchhung mite chu silaiin an kap a, hei vang hian civil mite chu an khua aṭang hian an tlanchhia nia sawi a ni. Local media-te chuan hemi ni hian region leh state pangaah inbeihna hi a thleng leh tih an tarlang.

Khawthlang ramte chuan Myanmar sipai sorkar chet dan hi demin hreknate pawh an siam tawh a, mahse mi tam tak chuan hei ringawt hi a tawk lo a, na zawka sipaite chunga chet an lak a ngai tawh niin an sawi.

Bachelet chuan sipaite'n Association of Southeast Asian Nations (ASEAN) nena tharum thawhna thlengte titawp a, remna kawng zawnga inbiakna nei tura inremna an lo siam tawh chu an zawm lo tih a sawi.

Ram chhunga harsatna tawk mek mipuite chhawmdawlna pek luh phalsak turin sipaite chu a ngen a, politics thil avanga mante pawh chhuah vek turin a phut bawk. Civil mite himna chu ngaihtuahsak a, civil mite laka airstrike an neih ṭhin pawh titawp nghal turin a phut bawk a ni.