Russia-in Syria-ah indo lawng a tir

US, UK leh France-te chuan Syria sipaiten an ram khawpui, Damasus khaw daia helho kuta awm, Douma khua laklet tuma a beihnaah tûr hlauhawm, chemical ralthuam a hmang nia sawi chhan let nana Syria ram hmun hrang hrang an beih hnuah, Syria ram ṭhian ṭha Russia chuan indo lawng pahnih chu Syria ramah a tir ve nghal nia sawi a ni.

Pathianni khan indo lawng lian pahnih, sipai motor-te phur tel chu Syria hmarlam tuipui kam, Tartus-a Russian naval base lam pana an kal hmuh a ni. Heng lawngah hian tank, truck, ambulance leh IED radar-te pawh an phur tel a ni.

Russia President Vladimir Putin chuan Syria-in chemical ralthuam a hmang nia puhna hi enfiah mek a ni a, a result pawh hriatchian a nih hmaa US kaihhruaia beih a ni mai hi a dem thu a sawi a, a nghawng let a awm ngei dawn tih pawh a sawi a ni. Syria hi beih leh a nih vaih chuan buaina nasa tak a chhuak dawn tiin Putin chuan a sawi.

Mahse US President Donald Trump chuan Syria sorkar hian a hmelmate beihna atana chemical ralthuam a hmang leh a nih chuan an bei leh nghal dawn tih a sawi thung. Russia chu Syria a thlawp avangin economic lama hrekna thar siam a ni tih a sawi bawk. Hei hi Trump-a kaihhruai sorkarin kar li chhunga Russia ram hrekna tur a siam pathumna tur a ni. Thla hmasa khan kum 2016 US President thlannaa inrawlha puh mimal leh company-te chu hrek an ni tawh a, hemi hnu hian Putin-a thawhpui hnaivai leh sorkar official ṭhenkhatte hrekna a siam tawh bawk. Russia spy hlui tur hmanga beihnaah Russia chu inhnamhnawiha puhin US-a Russian palai 60-te chu hnawhchhuah an ni tawh a, Seattle-a Russain Consulate pawh kharsak a ni bawk.