Inhremna atan mi tihhlum leh kut/ke tan sak hmang dawn : Taliban official

Afghanistan-a Taliban sorkar thara prison in-charge, Mullah Nooruddin Turabi chuan thil sualtite hremna atana tihhlum leh kut/ke tansak chu hman a ni leh dawn tih a sawi. Heng hremna hman hi ram himna atana thil ṭul a nih thu a sawi bawk.

Mullah Nooruddin Turabi chuan hremnate hi hman chhunzawm leh ni dawn mah se, Taliban sorkar hmasa an kalpui anga vantlang hmuhah tih erawh a ni tawh dawn lo tih sawiin, "Tumahin kan dan hman tur chungchang hi min rawn hrilh tur a ni lo," tiin ram dangte a vau zui nghal bawk.

August 15-a Taliban-ten thuneihna an chan hnu sorkar thar chu nem zawk leh huam zua zawka kalpui an lo tiam tawh a, mahse an sorkar hnuah arm chhungah human rights palzutna hrang hrang thleng report a awm reng tawh thung.

Kar liam ta Inrinni khan Taliban-te hian an ram khawthlang, Herat khuaah mi rubotu nia sawi mi pali an kahhlumte ruang chu mipuite hmuh turin an khawlaiah an pho lang. Herat province deputy governor Shir Ahmad Muhajir chuan heng mite ruang pholan a nih chhan chu mipuite hnenah mi rukbo chingte ngaihdam an ni ngai dawn lo tih zirtirna atana ti an nih thu a sawi.

Passport leh ID thlak dawn
Taliban sorkar chuan sorkar hmasain Afghan passport leh national identity card a pekchhuah chu an thlak vek dawn tih an sawi a, mahse a thara thlak anih hma chu hman zui a phalsak rih ang.

Deputy minister of information and culture leh sorkar thupuangtu, Zabiullah Mujahid chuan passport leh NID thar siamah hian 'Islamic Emirate of Afghanistan' tih ziah a ni dawn tih a sawi.

Taliban sorkar hian a hmain women ministry chu “Ministries of Prayer and Guidance and the Promotion of Virtue and Prevention of Vice” tiin a lo thlak tawh bawk a, hmeichhiate chu school an kal chhunzawm a la phalsak lo bawk.