Huawei hotu Meng Wanzhou chhuah a ni

Huawei chief financial officer, Meng Wanzhou chu Canada ramah kum thum dawn hren a nih hnuin, US prosecutor-te nen bank fraud case chungchangah inremna an siam theih tak avangin Inrinni khan China ramah a kir leh thei ta. Hemi ni vek hian China chuan ni 1,000 chuang alo hren tawh Canada mi pahnihte pawh an haw a phalsak ve ta bawk a ni.

Kum 49 mi, Meng hi kum 2018, December thla khan US-in bank fraud case a siamsak chungchangah US-Canada bilateral agreement hnuaiah Vancoucer-ah hren a ni. Huawei executive hi an company leh Iran thawhdun chungchangah thu dik lo sawiah puh a ni bawk. Meng man a nih avang hian China a thinur hle a, dan kalha hrengah puhin US leh Canada nena a inkar boruak pawh a chhiat phah hle. Kum 2018 vek hian Canada diplomat hlui Michael Spavor Michael Kovrig leh entrepreneur Michael Spavor-te pawh thungrulh nan a hreng zui ve nghal a ni.

US prosecutor-te nena inremna a siam hnuah Meng hi China hi panin, Shenzen airport-ah special plane hmanga phurh haw a ni a, airport-ah hian official-ten an lo hmuak a ni.