October aṭangin Gaza siamṭhat hna thawk ṭan dawn
Israel nena an inbeih aṭanga thla li hnu, October thla aṭangin Gaza Strip siamṭhat hna thawh khatna chu an thawk ṭan dawn.
Gaza Ministry of Public Works and Housing, Qatar Committee for Reconstruction of Gaza leh international party dangte nen siamṭhat hna hi an thawkho dawn a ni.
Ministry of Public Works under-secretary Naji Sarhan chuan ram ṭhahnem takin Gaza dinthar lehna kawngah hian ṭanpui an inhuam thu sawiin, hna chu kumin October thla aṭanga an ṭan theih tur thu a sawi.
"Qatar chuan Israel-in a beihna avanga residential unit tihchhiatte siamṭhatnan USD maktduai 500 pek a tiam a, Egypt chuan infrastructure leh kawngpui tihchhiat siamṭhatnan USD mtd 500 pek an tiam bawk a ni," a ti.
May thlaa ni 11 chhung inbeihnaah khan Palestinian 260 te chuan nunna an chan a, an zingah hian naupang 66 pawh telin, chenna in leh infrastructure ṭhahnem tak tihchhiat a ni.
Chenna in 2,000 bawr vel chu luah zui tlak lohin tihchhiat a ni a, unit 22,000 dang pawh chhe telin, hei vang hian Palestinian mi sang chuang chu sawnchhuah an ni. Building chhawng sang pali velte chu an tlusawp vek a, public structure 74 te pawh an chhe bawk.
Sarhan tarlan danin, hemi ṭuma inbeihnaa thil tichhiat hlutna belhkhawm hi USD mtd 497 vel a tling.
"Kum 14 chhung Israel-Egypt te hian khuahkhirhna an siam avangin bungrua mamawh angte an chawlut thei loin a awm tawh. Israel hian a ramri katlanga in sakna hmanruate lakluh a remtih loh avangin Gaza-a chengte dinhmun pawh a chhiat phah hle a ni," tiin Sarhan chuan a sawi.
Siamṭhat hna kalpui hi chhawng thuma kalpui tur a ni. A hmasa berah hian Qatari committee chuan residential home an sakṭhatsak dawn a, unit 1,000 tihchhiatte sakṭhat an nih bakah aṭhen a zar chhia unit 800 pawh siamṭhat tur zingah hian an tel.
Kuwait hian tower bomb chhiatte an siamṭhat tur thu sawi mah se an inremna hi official taka tihfel a la ni lo thung.
Gaza sorkar thupuangtu Salama Marouf chuan Israel-in Gaza tan insakna bungrua lakluh khapna chu sut a remti tawh tih a sawi.