Syrian air defence-in missile kap thla Syria President thlawptuten kawng an zawh

Syria anti-aircraft defence chuan Thawhṭanni zan khan Home province-a Shayrat airbase leh Damascus hmarchhak lama air base beihna tura missile kahchhuahte chu a kahhthlak sak.

Kar kalta Inrinni khan US, UK leh France ramte chuan Syria-in a mite beihna atan tur hlauhawm, chemical ralthuam a hmang nia puh chhan let nan Syria ram hmun hrang hrang an kap a, Syria chemical ralthuam dahṭhatna hmunte an kahchhiat sak a ni.

Hemi hnu Thawhṭanni zan, zanlai pelh hnu deuh khan Homs-a Shayrat airbase beih nana missile paruk kahchhuah zinga a tam zawk chu Syria air defence-ten lo manin kahthlak sak an nih thu Syria army media wing, War Media chuan a tarlang. Hei bakah hian Damascus hmarchhak lam, Qalamoun bilala Dumair air base kah tuma missile pathum kahchhuah pawh an target an thlen hmain lo kahthlak a nih thu a sawi bawk.

Thawhṭan zana Syrian airbase beih nana missile kaptu hi sawi chian a la ni lo a, US chuan a ni lo tih a sawi hnuah Israel kah a nih mai theih thu Syria sipaite chuan an sawi. Mahse hemi chungchangah hian Israel sipaite chuan engmah an la sawi ri ve lo.

Syria khawpui, Damascus-ah Thawhṭanni khan Syria mipui tam tak chuan an President Bashar al-Assad leh sipaite an thlawpna lantirin kawng an zawh. Kawngzawhte hian an ram flag-te kengin, Arab Syrian Army-te hlawhtlinna chu an chhuan thute an sawi a ni, halmawite an hal bawk.

Inspector-ten chemical ralthuam hmanna hmun tlawh dawn
Syria sipaiten Douma khuaa helho an beihnaa chemical ralthuam an hmang nia puhna chu enfiah turin international team, Organisation for the Prohibition of Chemical Weapons (OPCW) investigator-te tirh an ni a, he team hian Inrinni khan Syria hi thleng mah se Douma hi an tlawh phalsak an la ni lo a, vawiin-ah an tlawh phalsak an ni dawn chauh a ni.

OPCW team hian vawiin-ah Douma hi an tlawh a nih chuan sipaiten chemical ralthuam an hmang nia an sawi aṭang a ni 11-na a ni ang. Khawchhunga sample hrang hrangte lain an enfiah ang a, sipaite hian chemical ralthuam hi an hmang ngei em tih finfiah an tum dawn a ni. Mahse US chuan OPCW team an kal hma hian Russia lam aiawhte chuan an lo tlawh tawh a, hei vang hian finfiahna awmte pawh an lo tichhe mai thei niin a sawi. Russian Foreign Minister Sergei Lavrov chuan hei hi thu dik lo a nih thu a sawi thung.

April 7 khan Syria sipaite chuan hel kut aṭanga Eastern Ghouta bial laklet tuma an beihnaah mihring tana tur hlauhawm, chemical ralthuam an hmang nia sawi a ni. Sipaite hian chemical ralthuam awmna bomb pahnih chu Douma khuaah an thlak a, he bomb thlak tuartu chu an chilphuan te tlain, an vun a kang a, thawk lamah pawh harsatna an tawk nia sawi a ni. He khua hi Syria sorkar leh Russia sipaite kutah a awm tawh a ni. US chuan chemical bomb thlak tuartute thisen leh zun sample test aṭangin chlorine leh nerve agent-te hman a ni tih an finfiah niin a sawi. Mahse Syria chuan an puhna hi a pha thung a, helho thu phuahchawp mai niin a sawi thung a ni.