UN security team-in Douma an tlawh

United Nations-a Syria palai Bashar Ja'afari chuan UN security team chuan Syria sipaiten chemical ralthuam an hmanna nia sawi, Douma khua chu chemical weapon expert-ten an tlawh hmain Thawhlehni khan an lo tlawh tawh niin a sawi.

Syria sipaite chu helho kut aṭanga Douma khua laklet tuma an beihnaah, April 7 khan tur hlauhawm tak awmna bomb chu he khuaah hian an thlak nia puh a ni. Chemical ralthuam hman vang hian civil mi pawisawi lo tam takin an thih phah nia sawi a ni. Syria-in chemical ralthuam a hman vang hian a chhan let nan kar kalta Inrinni khan US, UK leh France chuan Syria hmun hrang hrang beiin, chemical ralthuam siamna leh an dahna hmunte chu missile 100 chuang zetin an kahchhiatsak a ni. Hetih lai hian Syria leh amah thlawptu Russia chuan he puhna hi thu dik lo niin an sawi thung.

Bashar Ja'afari chuan UN Security Council hnenah Thawhlehni khan UN security team chuan Douma hi an luh thu a sawi a, security dinhmun te an enfiah dawn a ni, a ti. UN team hian Douma khawchhung boruak chu a ṭha nia an sawi chuan a enfiah hna thawktute chuan an thawk ṭan dawn tih a sawi.

Douma khuaa chemical ralthuam hman a nih leh nih loh enfiah tur hian Organisation for the Prohibition of Chemical Weapons (OPCW) inspector-te tirh an ni a, anni hi nimin khan Douma khua an luh phalsak an ni chauh a ni. Hetih lai hian Syrian state news agency chuan POCW expert team hian Douma khua an lut tawh a, chemical agent hman a nih leh nih loh enfiah hna pawh an thawk ṭan tawh niin a sawi thung a ni.

Russia chuan Douma khuaa chemical ralthuam hman a nih leh nih loh enfiah hmaa ram pathumten Syria an bei nghal mai chu na takin a lo sawisel tawh a, UN-a Russia palai Vassily Nebenzia chuan UNSC hnenah US leh a thurualpui ramte chu roreltu leh thutlukna siamtu ang maia an chet tawh avangin chemical ralthuam hman leh hman loh chungchang chhui chian pawh hi awmzia a awm tawh lo a ni, a ti.