CIA hotuin a rukin NKorea hotu a hmu

US intelligence agency, Central Intelligence Agency (CIA) hotu Mike Pompeo chu April chawlhkhar tir khan North Korea ramah a ruka zinin, North Korea ram hotu lu ber Kim Jong-un nen an inkawm nia sawi a ni.

Mike Pompeo hian US President Donald Trump leh Kim Jong-un ten meeting an neih tur inbuatsaihna atan NKorea hi a lo hmu nia sawi a ni. Hemi chungchang hi sawichhuah a la ni lo a, mahse President Trump chuan an ram tlawhtu, Japan PM Shinzo Abe nena an inkawmnaah North Korea nen direct-a inbiakna an neih ṭan thu a hrilh. Trump chuan high level-ah NKorea nen inbiakna an neih thu a sawi a, mahse a bak erawh a sawichiang lo. US leh NKorea ram hruaitute hian June thla tir lam hian meeting an neih rin a ni a, an meeting neihna tur hmun pawh hi ngaihtuah mek a ni bawk.

Pompeo leh Kim ten meeting an neih hi kum 2000 hnua US-NKorea high level-ten meeting an neih leh hmasa ber a ni. Kum 2000 khan hetih laia US Secretary of State chu NKorea-ah hian zinin, Kim Jong-un-a pa Kim Jong-il nen an inhmu a ni.

Kim Jong-un-an meeting nei tura a sawmna chu President Trump chuan a pawm thu a sawi tawh a, an meeting neih tur buaipui hian CIA chuan NKorea intelligence agency, Reconnaissance Intelligence Bureau chu a thawhpui mek a ni. Pompeo hian South Korea National Intelligence Service director Suh Hoon pawh a bia nia sawi a ni bawk.

President Trump chuan King Jong-un nena an inhmuh hun tur chu a nghahhlelh tawh thu Thawhlehni khan a sawi a, inbiakna ṭha leh hlawhtling tak an neih a beisei thu a sawi.