Fidel Castro-an Diaz-Canel hnenah president nihna a hlan

Cuba ram hruaitu, Raul Castro chuan amah thlaktu atana thlan, Miquel Diaz-Canel-a kutah Ningani khan Cuba ram president nihna a hlan ta.

Kum 10 chhung Cuba ram hruaitu nihna lo chelh tawh, Raul Castro-an a chawlh tur thu a sawi hnuah an ram parliament, National Assembly chuan Nilaini khan kum 57 mi, Miquel Diaz-Canel hi Castro-a thlaktu atan an thlang a ni. Ningani khan Castro-a hi president aṭanga bangin, Diaz-Canel-a kutah thuneihna a hlan. Kum 60 chhung Cuba ram rorelna chu Castro unau kuta a awm hnuah midang kutah hlan a ni ta a ni.

Kum 86 mi, Raul Castro hian kum 2008 kha a u, Fidel Castro-a hnen aṭangin Cuba ram president nihna hi a la chhawng a ni. Kum 10 ro a rel hnuah midang kutah thuneihna a pe ve leh ta a ni. President a nihna aṭangin chawl mah se, rorellai Communist Party hotu nihna chu kum 2031 thleng a la chelh chhunzawm ang. President thar kuta thuneihna a hlan hnua thu a sawiah, Castro chuan an ram sorkar venghimtu sipai ṭha tak a ni chhunzawm zel dawn tih a sawi a, hemi rual hian chawlh leh zin khawthawnna hun tam zawk a nei thei dawn ta tiin fiamthu a thawh zui bawk.

President thar Diaz-Canel pawhin thu sawiin, Cuba rama communist system chu vawnnung zel a tiam a, an ram economy siamṭha a, sorkar leh mipuite inpawhna ṭha tak siam zel a tum thu a sawi. Communist Pary chu an ram nun kaihruaitu, mipuite pumkhatna siamtu a ni, a ti. Diaz-Canel chuan National Assembly leh communist party chuan ruahmanna a lo siam tawhte hlenchhuak turin a thawk zel dawn tih a sawi. A kaihhruai sorkar chuan US nena thawhdunna ṭha nei tura inbiakna neih a duh thu a sawi a, hemi rula hian Cuban system thlak tura phutna erawh a hnawl nghal.

Cuba ram mipuite chuan an president thar hnuaiah an ram economy pawhin hma a sawn an beisei thu an sawi. Cuba ram sum dinhmun hi a ṭha lo hle a, hnathawktute sum lakluh pawh chawh rualin thla khatah dollar 30 vel a ni.

Cuba state media chuan Russia President Vladimir Putin chuan president thar Diaz-Canel hi lawmpuina hlanin, Castro hnenah pawh ram pahnihten thawhdunna ṭha tak an neih avangin lawmthu an hrilh bawk niin a tarlang. China President Xi Jinping pawhin Cuba nen chuan ṭhianṭha tak an nih thu leh, inzawmna thuk zawk neih pawh a duh thu a sawi.

Hetih lai hian US State Department thupuangtu, Heather Nauert-i chuan president nihna inhlanchhawng chungchangah an lawm lo tih a sawi a, an thiltih dan chu democracy kalphung lo leh Cuba mipuiten an ram inrelbawlnaa thuneihna an neih loh zia lantirna a ni, a ti. US Vice President Mike Pence chuan Cuba ramah chuan dik leh felfai taka inthlan buatsaih a, politics avanga tangte chhuah an nih a, Cuba mipuite an dikna chanvo dik tak an neih theih hma chuan US chuan a ngawihsan mai mai dawn lo tih a sawi.