WW2 bomb sut dawn vangin mi tam tak sawnchhuak

Indopui II na hunlaia ami bomb, kar kalta Nilaini-a Germany khawpui, Berlin bula Heidestrasse-a in sakna hmunah hmuhchhuah chu nimin zing khan sut a nih dawn avangin bomb hmuhna chhehvela awmte chu sawnchhuah an ni.

Police-te chuan bomb hmuhchhuah hi British bomb a nih thu leh, kg 500-a rit a ni tih an sawi. Bomb sut a nih dawn vang hian a hmuhna aṭanga meter 800 biala awmte chu sawnchhuah an ni a, hemi bial huam chhungah hian government ministry building, hospital leh central railway station pawh a awm a ni. Hei bakah hian Indonesia leh Uzbekistan embassy pawh an awm bawk.

Indopui II hunlai, kum 1039-45 chhunga bomb thlak tam tak chu puak loin a awm a, heng bomb-te hi kumtinin hmuhchhuah an awm reng a ni. Kum 2017, May thla khan Hannover-ah British siam bomb pathum hmuhchhuahte chu sut an nih dawn vangin Hanover-a cheng mi 50,000 chu thiarchhuah an ni. Kum 2016 December, May 2015, January 2012 , January leh December 2011 te khan Indopui II hunlaia mi bomb hmuhchhuah an lo ni tawh bawk. Germany khawpui, Berlin-ah hian bomb 2,000 vel zet a la inphum rin a ni.