Germany inthlanpuiah Merkel-i party chak zo lo ; Kum 16 hnuah SPD-in sorkar thar siam dawn

Germany ram inthlanpui, Pathiannia neih takah rorellai, Chancellor Angela Merkel-i kaihhruai conservative bloc, Christian Democratic Union of Germany (CDU) leh Christian Social Union (CSU) chu an chak zo lo.

Inthlanah hian Centre-left Social Democrats (SPD) chuan hnehna changin, kum 16 chhung Angela Merkel kaihhruai conservative rorelna chu an titawp dawn ta a ni.

SDP hian hnehna chang mah se, sorkar siam turin majority a nei pha bik lo a, hei vang hian party dang a thawhpui a ngai dawn a ni. Social Demcorats Chancellor candidate, Olaf Scholz chuan party dangte chu inbiakna an neihpui thuai dawn tih a sawi. Germany tan sorkar ṭha leh nghet dan an siam dawn tih a sawi.

Kum 63 mi Scholz hi Merkel-i hnuaiah cabinet minister a ni a, Hamburg khaw mayor hlui a ni bawk. Indopui II-na hnuah SPD aṭanga Germany Chancellor ni thei palina a ni ang.

SDP hian vote tla aṭangin 25.7% hmuin, CDU-CSU-in 24.1%, Greens party-in 14.8%, FDP-in 11.5%, AfD-in 10.3% leh Left-in 4.9% an hmu.

Kum 1990-a Germany inzawm leh hnua inthlan buatsaihah kumin hi Merkel-in a chuh loh ṭum khatna a ni. Sorkar thar a din hma chuan carataker leader angin a awm chhunzawm rih ang.