Chemical ralthuam endiktuten Douma-ah hna thawk ṭan

Syria sorkarin helho awp khua a beihnaa chemical ralthuam a hmang nia puh chungchang enfiahtu tur, Organization for the Prohibition of Chemical Weapons (OPCW) inspector-te chuan chemical ralthuam hmanna nia sawi, Douma khua chu Inrinni khan lutin, hna an thawk ṭan nghal.

OPCW chuan thuchhuah siamin, expert team chuan Douma khawchhak lama hmun pakhat tlawhin, April 7-a Syria sipaiten chemical bomb an thlak nia sawi chungchang enfiah leh zirchiang turin sample pawh an lakhawm niin a sawi. Thil awmdan thlirin, a ṭul dan azirin hmun dang pawh an la tlawh dawn niin a sawi bawk.

Douma khua aṭanga sample an lak hi enfiah turin Rijswijk, Netherlands-a OPCW laboratory-ah thawn a ni ang.

UN security team chuan kar kalta Zirtawpni khan a ṭum hnihna atan Douma khua hi lutin, OPCW team-te an kal hmain khawchhung boruakte an lo thlithlai hmasa a ni. UN team hi an kal hmasakin silai tihpuah a ni a, hei vang hian Damascus-ah a kir leh a, a hnuah an kal ṭha leh a ni.

Syria sorkar sipaite chu April 7-a Douma khaw helte an beihnaah tur hlauhawm, chlorine gas an hmang nia puh a ni. Chemical ralthuam hmang nia puh a nih vang hian April 14 khan US, France leh Britain chuan missile hmangin Syria-in chemical ralthuam a dahṭhatna hmun nia sawi hrang hrang an kahchhiat sak a ni. Mahse Syria sorkar chuan an puhna hi a pha a, ramdang sipaite koh luh an nih theih nana helho leh anmahni thlawptute thu phuahchawp mai niin a sawi thung.