Kabul-a bomb puakah mi 12 thi

Afghanistan khawpui, Kabul-a voter registration centre bulah nimin khan thihchilh bomb a puak a, mi 12 an thi a, midang eng emaw zatin hliam an tuar.

Bomb puah lai hian centre aṭagan identity card lak chhuah tum mi eng emaw zat an intlar a ni. Official-te chuan nimina pawikhawihna thleng hi eng pawl tih nge hriat a la nih loh thu an sawi a, hetihlai hian Taliban firfiak pawl thupuangtu chuan a pawlin inhnamhnawihna an neih loh thu an pawl twitter-ah a tarlang nghal a ni.

Interior Ministry thupuangtu Najib Danish chuan bomb tipuaktu hian ke-in centre hi a pan a, October thlaa Parliament inthlan neih tura tana voter in register-te hnena identity card pekchhuah a nih laiin a bomb pai hi a tipuak niin a sawi. Bomb puak hian centre bula motor leh building-te pawh a tichhe tel a ni.

Bomb puahna hmun hi Kabul khawthlang lam, Dasht-e Barchi hmun a ni a, he hmun hi Shitte Hazar hnam tamna hmun niin, Islamic State firfiakten pawikhawihna an thlen fo a ni.