SKorea-in loudspeaker titawp

South Korea chuan tunkar tawp lama an ram president Moon Jae-in leh North Korea ram hotu Kim Jong-un te meeting neih tur atana boruak ṭha siam tuma a hmalakna pakhat atan nimin aṭang khan ramri bula NKorea lam hawia loudspeaker a hman ṭhin chu a titawp. Hei hi kum hnih chuang hnua loudspeaker an tihtawpna hmasa ber a ni.

SKorea hian ramri bulah hian loudspeasdker ṭhahnem tak chu North lam hawi hian a dah a, heng aṭang hian North lam tana chanchin hriat nuam lo tak tak, Kim Jong-un sawichhiahtna te leh K-pop music-te thlengin ring takin a tichhuak ṭhin a ni. Heng loudspeaker aṭanga an tihchhuahte hi ramri bula NKorea sipai duty leh, ramri bial huam chhunga civil mi chengte chuan an hre thei vek a ni.

North Korea pawh hian South lam hawi hian loudspeaker a dah ve tho a, anni hian an tihtawp dawn leh dawn loh an la sawi lo. North lam pawh hian SKorea leh a thurualpui ramte sawiselna leh Kim fakna thu an tichhuak ve ṭhin bawk. Kum 2004 khan ram pahnihte chuan inremna siamin, ramri-a loudspeaker aṭanga an thil puanchhuahte hi an titawp a, mahse kum 2015-a demilitarised zone (DMZ) NKorea-in palpuah bomb a dah puak vanga South Korea sipai pahnihten hliam na tak an tawrh vang khan SKorea chuan loudspeaker hi a hmang leh a ni. Kum 2015 kumtawp lam khan hun rei vak lo tihtawp a ni leh a, mahse North-in hydrogen bomb a enchhin avangin a chhan let nan kum 2016 khan a hmang zui leh ta a ni.

SKorea leh NKorea ram hruaitu pahnihte hi Zirtawpni hian ramri bula Panmunjon khuaah an inbe dawn a, hei hi kum sawm chuang hnuah Korea ram pahnihten inbiakna an neih hmasak ber tur a ni. Kim Jong-un hian June thlaah US President Donald Trump chu meeting a neihpui dawn bawk a, hei hi US leh NKorea ram hruaitu ṭanglaiten meeting an neih hmasak ber tur a ni bawk.

Kum 2000 leh 2007 khan inter-Korea summit neih a lo ni tawh a, heng hunah hian NKorea ram hotu ni ṭhin Kim Jong-Il leh SKorea president hlui pahnih Kim Dae-jung leh Roh Moo-hyn te an tel a ni.