Nashville-a inkahna thlengah mi pali thi

Nashville, US-a Waffle House restaurant-ah Pathianni zing han mi pakhatin silai a pawng kah a, mi pali a kaphlum. Pawikhawihtu hi customer pakhatin manbetin a silai a laksak a, amah erawh chu a tlanchhe hman a ni.

Thuneitute chuan pawikhawihtu hi kum 29 mi, Travid Reinking niin an sawi a, restaurant-a pawi a khawih hma hian parking lot-ah mi pahnih a kaphlum niin an sawi. Restaurant-ah hian a silai, AR-15 rifle mu hi a kahruah hnuah customer hian manbeh a tum a, mahse a jacket phelhin a tlanchhe hman a ni. Mi pali a kahhlum bakah mi dang pali-in hliam an tuar bawk.

Nashville Police hotu Steve Anderson chuan Reinking-a pawikhawihna chhan tak hi hriat theih a la ni lo tih sawiin, amah hi rilru lam harsatna nei a nih mai theih thu a sawi. Nikum July thla khan US Secret Services agent-te chuan Reinking hi White House-a mipui vantlang kal phal lohna china a kal vangin an lo man tawh a ni. Special Agent Todd Hudson chuan Reinking hi kalsawn tura an tih pawhin President Donald Trump hmuh a duh thu sawiin a kalsawn duh lo a, hei vang hian an man ta niin a sawi.