Tibet hi China-ah a bet zel thei ang - Dalai Lama

Tibet sakhaw hotu Dalai Lama chuan China-in Tibet bial culture leh thuneihnate a zahsak chuan Tibet chu China-ah a bet chhunzawm zel thei ang tiin Pathianni khan a sawi.

Nehru Memorial Museum and Library leh Antar-Rashtriya Sahyog Parishad huaihawta New Delhi-a 'Role of Ethics and Culture in Promoting Global Peace and Harmony' chungchang a sawinaah Dalai Lama chuan he thu hi a sawichhuak a ni. "History leh culture aṭanga thlir chuan Tibet hi independent ram a ni. China hian kum 1950 khan Tibet thuneihna hi a laksak a ni. Mahse China Constitution chuan kan culture leh Tibet bial thuneihna chu a pawmsak a nih chuan, China-ah hian a awm chhunzawm zel thei ang" tiin a sawi.

Dalai Lama chuan Myanmar rama Rohingya Muslim-te chungchang pawh sawichhuakin, an tawrhna chu a pawiin a lungchhiatthlak hle a ni, a ti. Hmasawnna leh muanna a awm theihna atan hnam leh sakhaw hrang hrangte chuan an inhriatthiam lohnate dahṭha a, lungrual taka an thawhho a ngai a ni, a ti.

Dalai Lama leh a ṭhuihruai eng emaw zat chu kum 1959-a China sipaiten Tibet an beih ṭum kah India ramah tlanchhiain, Dharamsahal-ah an khawsa zui a ni. China chuan kum 82 mi, Buddisht puithiam hi China aṭanga Tibet lakhran tuma Tibet mipuite fuihah a puh a ni.