Biden-a'n Covid booster la ; America mipuite vaccine la turin ngen

US President Joe Biden chuan Thawhṭanni khan Covid-19 booster dose la in, America mipuite chu hri inkaichhawn awlsam tak Delta variant laka an him theihnan vaccine la turin a ngen.

Joe Biden chuan World Health Organization leh health expert te'n US khua leh tuite tana Covid vaccine dose thumna an semchhuah hmaa ram rethei zawkte hnena vaccine tam zawk pe chhuak tura an ngenna an tihhlawhtlin loh avanga sawiselna chu hnawlin, "Khawvel ram dang zawng aiin kan thawk ṭha zawk a, kan tihtur chin chu kan ti zel bawk ang," a ti.

US Centers for Disease Control and Prevention (CDC) leh US Food and Drug Administration (FDA) chuan kar hmasa khan kum 65 chin chunglam leh natna benvawn neite tan Pfizer vaccine booster dose semchhuah hi an thlawp thu an sawi. CDC chuan industry lian tak taka front-line worker-te pawh booster dose pek hi ṭha an tih thu a sawi.

"He hripui leng hneh tur leh nunna chhanhim tur te, kan naupangte himna tur te,school kan hawn reng theihnan te, kan eibar zawnna kan kaltir theihnan te vaccine kan lak hi a ṭul a ni," tiin First Lady Jill Biden pawhin booster dose a lak tur thu Biden chuan a sawi. "Khawngaih takin thil dik tak ti rawh u. Vaccine la rawh u. In nunna bakah in chenpuite nunna pawh a chhanhim thei a ni, awlsam takin a thlawn vekin a lak theih a ni," tiin President chuan America mipuite chu vaccine la turin a sawm.

Kar liam taa UN General Assembly-a a thusawiah, Biden chuan US sorkar chuan Pfizer vaccine an lei ṭhin chu a leta an tihpun tur thu leh nakkum lamah chuan ramdang tan dose tluklehdingawn 1.1 chuang semchhuah an tum tih a lo sawi tawh bawk a ni.

CDC data-in a tarlan danin, US-a cheng zinga mi maktaduai 183 chuang, 65% vel chuan vaccine dose bikimin an la tawh. Hetih lai hian an ram chhunga vaccine lak ṭhat lohna hmun - Texas, Louisiana, Mississippi, Alabama leh Florida-ahte hri kai thar an pun chhoh a hlauhthawnawm thu thuneitute chuan an sawi.

US health official-te chuan America mipuite chu vaccine an lak aṭanga thla ruk liam hnuah chuan booster dose la turin an ti a, hetih lai hian booster dose lak chungchangah medical expert-te chu an ngaihdan an in ang lo hlawm thung. Mahse Pfizer data chuan vaccine-in taksaa natna a do theihna chu hun a liamin a tlahniam ve zel tih a tarlang a, hei vang hian booster dose pawh hi lak a ṭul niin expert ṭhenkhat chuan an ngai a ni.