Taliban sorkarin khapna siam belh zel ; TV leh radio-ah hmeichhe zai leh aw ri tihchhuah khap

Afghanistan-a roreltu, Taliban chuan sorkar huamzau zawk siamin, hmeichhiate dikna chanvote pawh zahsak an nih tur thute lo sawi tawh mah se, sorkar thar an siam hnuah khapna hrang hrang tichhuakin, a bikin hmeichhiate tan khapna dan an siam chho leh mek.

Hmeichhiate chu school khapsak an ni hnuah, women ministry hming pawh an thlak tawh bawk. Hmeichhe hnathawk tam tak pawh an hna kal chhunzawm tawh lo tura tih an ni. Kandahar province-ah Taliban chuan hmeichhe zai leh aw ri chu TV leh radio channel-a tihchhuah a khap leh bawk. Hmeichhiate chu infiamna lamah an tel a phal tawh lo bawk a, Afghanistan women cricket team pawh an khelh chhunzawm an remti lo. Cultural commission hotu Ahmadullah Wasiq chuan infiamna chu hmeichhiate tana thil ṭha leh ṭul nia an hriat loh thu a sawi a ni.

Taliban-te hian Helmand province-a mipate chu hmuihmul ziah fai a khap tawh bawk a, Islamic law kalh a ni tiin, he dan bawhchhiate chu hrem an nih tur thu an sawi.

Heng tebakah lehkhachaih (kite-flying) pawh Afghanistan-a roreltute hian khapin, lehkhachaih hian tlangval ṭhalai zawkte chu an ṭawngṭai leh sakhaw thil pawimawh an tih turte a tihbuai phah niin an tarlang.