NKorea-in missile kapchhuak leh

North Korea chuan ballistic missile ni ngeia hriat chu a kapchhuak leh niin nimin khan South Korea leh Japan official-te chuan an sawi.

South Korea joint chiefs of staff thuchhuah chuan nimin zing darkar 6.40 vel khan North Korea hian an ram hmar lama Jagang province aṭangin khawchhak lam tuipuiah thil kahchhuah a nei tih sawiin, hemi chungchang hi SKorea leh US thuneitute chuan an zirchiang mek tih a tarlang. Japan prime minister Yoshihide Suha chuan NKorea thil kahchhuah hi ballistic missile ngei nia a lan thu a sawi thung.

NKorea hian tun thla chhunga missile a enchhin ṭum thumna a ni a, a hmain cruise missile leh ballistic missile a lo enchhin tawh bawk. NKorea hi United Nations in a hrek mekna hnuaiah ballistic missile enchhin hi khapsak a ni.

Hetih lai hian UN General Assembly-a NKorea palai, Kim Song chuan thu a sawiah, an ram chuan invenna atan ralthuam siam turin dikna a nei a ni, a ti. "Kan ram himna tur, leh kan invenna atan kan beih a ngai a ni," tiin Korean War tihtawpna treaty mumal tak a awm lo a, hetih lai hian an ṭhenawm South Korea-ah US chuan sipai 30,000 dawn a dah reng bawk tih a sawi. US hian hetianga an ram a epna hi a tihtawp chuan, anni pawhin ṭha takin an chhang let ve nghal dawn tih a sawi.