Armenia Prime Miniseter a bang

Armenia Prime Minister Serzh Sargsyan chu amah duh lohna lantira mipuiten hun eng emaw chen nawrh an huaihawt hnuah Thawhṭanni khan PM a nihna aṭangin a bang.

Serzh Sargsyan a ban tak avangin PM hlui Karen Karapetyan chuan PM hna hi a lo chelh lailawk a ni.

President Armen Sarkissian chuan Sargyan-a leh a kaihhruai sorkar banna thehluh hi a pawmsak tawh bawk.

Sargsyan hi kum 10 zet Armenia president a lo ni tawh a, president a nih loh hnuah prime minister dinhmun chuh zui a tum loh thu pawh a sawi. Mahse kar hmasa khan Parliament chuan prime minister atan a thlang a, hei hi eptu lamte chuan thu duh loin, Sargsyan chu thuneihna bansan phal lohah an puh a ni.

Eptute hian PM Sargsyan leh a kaihhruai sorkar duh lohna lantirin hun eng emaw chen nawrh an huaihawt a, Pathianni khan eptu hruaitu Nikol Pashinyan chu man a ni a, mahse Thawhṭanni-ah chhuah leh nghal a ni. Pashinyan-a chhuah a nih hnuah Sargsyan chuan PM aṭanga a ban tur thu hi a puang a ni.

Sargsyan chuan a ban thu hi a website-ah tarlangin Nikol Pashinyan chuan tidikin, amahin a lo tisual zawk niin a sawi a, an rama harsatna thleng mek chu chinfel dan kawng hrang hrang awm mah se hma la zui loin, prime minister a nihna aṭanga a ban zawk tur thu a sawi. A thupuangtu Hovhannes Nikoghosyan chuan Sargsyan chuan mipuiten nawrh an huaihawt chungchangah mawhphurhna lain, an duhdan angin a ti ta niin a sawi bawk.