Toronto-ah motor-in ke-a kalte pawng chil

Canada-a Ontario province khawpui, Toronto-ah Thawhṭanni khan mi pakhatin ke-a kalte chu a motor van-in a pawng chil a, mi 10 an thi a, mi dang 15 in hliam an tuar.

Van khalhtu hi kum 25 mi Alek Minassian a ni a, firfiak leh helpawl zawmpui a nei lo nia a lan thu official-te chuan an sawi. He thil thlen hun hi chawhnu dar 1.30 vel niin, kawng lun lai, Yonge Street leh Finch Avenue pengṭhuam bul, sumdawnna hmun pawimawh leh office building eng emaw zat awmna hnaih a ni. Driver hian minute 20 chhung vel chu ke-a kalna, sidewalk-ah a motor hi khalhin mi tam tak a su a ni. Police office-in lo dan tuma a silai a tin pawhin driver hian “Min that rawh” tiin a au zui a ni. A hnuah silai pawh a keng tel nia sawiin police hi a vau zui a, mahse police officer hian umin a man zui ta a ni.

Minassian hi Toronto khaw dai, Richmond Hill-a cheng niin kum 2011 aṭang khan Seneca College-ah computer software a zir a ni. A van hman hi Ryder company ta a hawh a ni bawk.

Canada Prime Minister Justin Trudeau chuan pawikhawihna thlenga thi chhungte a tawrhpui thu sawiin, hliam tuarte pawh an dam thuai a duhsak thu a sawi. PM chuan he thil thleng hi uluk taka chhui chian anih tur thu leh, Canada mipuite himna turin dan lekkawhtute nen theihtawp an chhuah zel tur thu a sawi.

US pawhin Toronto-a thil thleng chu pawi a tih thu sawiin, a chhui zuina kawngah Canada-in puih a ngaihna angah chu puih zel a inhuam thu a sawi.