North Korea nuclear test site la hawn chhunzawm

North Korea ram hotu lu ber, Kim Jong-un-an an ramin nuclear leh ballistic missile a enchhin ṭhin chu titawpin, nuclear an enchhinna hmunte pawh khar vek a ni dawn tih a sawi hnuah, heng hmunte hi la hawn a nih thu leh, dan pangngai anga hna pawh thawh chhunzawm reng a la ni tih specialist webiste chuan nimin khan a tarlang.

Website 38 North in a tarlan danin, satellite image aṭanga an zirchianna aṭangin Punggye-ri nuclear test centre-a section dangah leiverh, tunnel thar pawh hmuh a ni, a ti. He tunnel tharah hian March thla laihawl vel atang khan hna thawh hi timuang mah se April thla tir lam thleng khan hna thawh hi chawlhsan a la ni lo. Tunnel hi zawhfel a nih loh pawhin nuclear test neih lehna turin buatsaih na ni zawk mai thei niin website chuan a tarlang a ni.

Johns Hopkins University nena inzawm, 38 North wesbite chuan an zirhcianna aṭangin nuclear base hian South Portla lamah tunnel dang a nei bawk a, he hi nakin zela nuclear test-na atana hman theih tur a ni tih a sawi. Mi ṭhenkhatin kum 2017 September thlaa NKorea-in nuclear test a neihna Punggye-ri chu hman chhunzawm theih a nih loh vangin NKorea chuan a khar nia an sawi chu an zirchianna aṭanga an pawm loh thu an tarlang bawk a, Punggye-ri nuclear test site hi nuclear ralthuam enchinna turin a hman chhunzawm tlak tih fiahna a awm lo tih a sawi. Sorkarin thu a pe a nih chuan nuclear enchhinna tur hmun pahnih a awm tih a sawi.