Trump leh Macron-te inkawm Iran nuclear deal programme sawidun

US tlawha zin, France President Emmanuel Macron leh US President Donald Trump-te chu Thawhlehni khan an inkawm a, ram pahnihte inlaichinna chungchang bakah Iran nuclear programme te an sawidun.

Inbiakna an neih zawh hnuah chanchin thar lakhawmtute an kawmnaah, Donald Trump chuan Iran nuclear programme chungchanga kum 2015-a inremna an lo siam tawh chu a sawisel a, hei aia lian leh huam zau zawk siam a nih mai theih thu a sawi. Marcon pawhi inremna siam thar chuan Iran ballistic missile programme leh Middle East huam chhunga a chanvo neih thlengin a huam tel dawn niin a sawi.

Hetih lai hian Iran chuan kum 2015-a nuclear deal an lo siam tawh aṭanga US a inhnuhdawh chuan nghawng pawi tak a neih tur thu sawiin a vau let thung. Kum 2015 kahn Iran chuan US-in economic lama an ram a hrekna hlih a nih theih nan a nuclear programme kalpui chu chhunzawm tawh loh a lo remti tawh a ni.

US President hlui Barack Obama hunlaia khawvel ram thiltithei zual leh Iran-in nuclear deal an siam hi May 12 hian a tawp dawn a, President Trump chuan he inremna hi pawhsei tumna chu hnawlsakah a lo vau tawh a ni. Mahse Marcon chuan Trump hi inremna hi kalpui chhunzawm zel tur leh, thlan tur dang a awm loh thu a lo hrih tawh a ni.

Germany Chancellor Angela Merkel pawhin Zirtawpni hian US tlawhin, Iran nuclear deal siam tawh hi pawm chhunzawm zel turin Trump hi sawipui a tum a ni. Iran foreign minister Javad Zarif chuan nuclear deal aṭanga US a inhnuhdawh chuan Iran chuan he inremna hi a kalpui dawn tawh lo tih a sawi.

Trump chuan 2015-a inremna siam hi a ṭha tawk loin awmzia a nei lo niin a sawi a, inremna siam hian Yemen, Syria leh Middle East hmun dang pawh a huam tel tur a ni, a ti.