President Trump-a'n security adviser hlui Flynn a ngaidam

US President Donald Trump chuan Federal Bureau of Investigation (FBI) hnena thu dik lo hrilhtu, national security adviser hlui Michael Flynn chu a ngaidam tih a puang. 

President Trump chuan a twitter-ah hemi chungchang hi tarlangin, "General Michael T.Flynn chu ngaihdamna famkim pek a ni", tiin Army lieutenant general hlui chu Thanksgiving hlim taka hmang turin duhsakna a hlan nghal bawk. 

Flynn pawhin President-in a ngaihdam avanga lawmthu sawiin, a twitter-ah Bible chang, Jeremia 1:19 thu, " chu a tarlang ve nghal a ni. 

Ngaihdam a nih tak avangin kum 2016-a Trump presidential transition hunlaia Russia lam nen an inbiakpawh chungchanga FBI hnena dawt a hrilh avanga Flynn laka criminal case siam chu tihtawp a ni dawn ta a ni. Kumin May thla khan Department of Justice chuan kum 2016 President inthlanna neihah Russia a inrawlh nia sawi chungchang, FBI-in a chhuinaah Flynn-an dawt a sawi nia puhna chu court-ah finfiah theih a ni lo tih sawiin, a thubuai hi tihtawp sak turin a lo ngen tawh bawk. 

President Trump-a'n Flynn a ngaihdam thu a puang hi Democrats lam chuan an sawisel zui nghal a, Democratic US Congress man Adam Schiff chuan Trump chuan a ṭhianṭha leh amah humtute lawmman pekna atan a thuneihna dik lo takin a hmang niin a puh. Hetih lai hian tun hma lam pawhin President kalchhuak turte hian an term zawh hma lawk hian thubuai nei lai ngaihdam eng emaw zat an lo nei tawh hlawm a, an ngaihdam zingah hian thubuai khirh tak neite pawh an tel fo a ni. 

2016 US President inthlanna neiha Russia inrawlha puh chungchang chhuinaa thubuai siamsak zingah Flynn hi President Trump-a'n a ngaihdam pahnihna a ni. A hmain Roger Stone chu a lo ngaidam tawh bawk.