Israel-in African pemlutte thawn kir tumna titawp

Israel sorkar chuan an rama Africa mi, dan loa pem lutte tihluihna hmanga thawn kir a tumna chu a titawp.

Supreme Court hnena hriattirna a pekah, sorkar chuan pem lutte thawnkir chungchang chu ngaihtuah chhunzawm a nih loh thu a sawi. Hetih lai hian immigration hotute chuan thawn kir an nih theih dan kawng hi an la zawng dawn nia sawi a ni thung.

Israel-ah hian Africa aṭanga dan loa pem lut mi 30,000 vel an awm nia chhut a ni a, a tam zawk hi Eritrea leh Sudan aṭanga lut an ni. Sorkar chuan dan loa pem lutte hi sum pe a, an rama an kirna tur thlawhtheihna ticket pek a tum a, hemi zawm lote chu tihluihna hmanga thawn kir an ni ang tiin a sawi a ni.

UN chuan Israel-in pem lut zinga a zahve chu khawthlang ram hrang hranga sawnchhuah a, a bak chu Israel rama an awm chhunzawm theihna turin rawtna a siampui a, mahse he rawtna hi Israel Prime Minister Benjamin Netanyahu chuan a hnawl a ni.

Thawhṭanni kahn US House of Representative-a Democratic member 18-te chuan Netanyahu hi lehkha thawnin, UN rawtna a hnawl chu pawi an tih thu an sawi. Israel-a pem lutte chu rilru buai tak, an awm zel dan tur pawh chiang loah a dah an ni, an ti.

Africa aṭanga Israel-a pem lut tam zawk, Eritrea mite hian an ram hruaitute rorel dan rawng tak vanga tlanchhia niin an insawi a, mahse Israel chuan khawsak phung nuamsa zawk beiseia pem niin a ngai thung. Pem lut zinga a tam zawk hi Israel-in thlaler ramri-a hungna bang a siam hmaa Egypt aṭanga lut an ni a, ramri hungna siam hian dan loa pem lut tam tak chu a dang tawh a ni.