Israel Defence Minister-in Syria a vau

Israel Defence Minister Avigdor Lieberman chuan Syria chu Israel sipaite lakah Russia S-300 missile hmang lo turin a vau a, a hmang a nih chuan na taka chhan let a ni ang, a ti.

Lieberman chuan an thlawhtheihna kap an awm a nih chuan, a kaptu an tihchhiat vek tur thu a sawi. Hei hi Russia official-in Russia-in Syria hnenah S-300 anti-aircraft defence system pek a tum thu a sawi a chhan letna a ni.

Minister chuan Russian system-te hi Syria-ah awmin an ram leh an sipaite laka hman a la ni lo a, mahse Syria hian a hmang a nih chuan an chhanglet ngei dawn tih a sawi. Syria tualchhung inrelbawlnaah Israel chu a inrawlh ngai lo a, mahse Iran-in Syria ramah Israel beihna tura ralthuam thawn luh a tum a nih chuan an remti ngai dawn lo tih a sawi bawk. Hemi rual hian Israel leh Russia chuan inzawmna ṭha tak an neih thu a sawi a, an lakah Russia-in buaina siam a tum a ring lo a, anni pawhin buaina neihpui hi an tum lo tih a sawi.