Scotland-in a thlawnin sanitary products sem dawn
Scotland sorkar chuan an rama hmeichhiate tan a thlawnin sanitary products a sem tawh dawn a, khawvela 'period poverty' umbona tura hma la hmasa ber ram a ni.
Vantlang hmun hrang hrangah - community centre leh youth centre-te bakah damdawi dawr-ahte hmeichhiate mamawh, tampon leh sanitary pad-te chu a thlawna lak theih turin a dah dawn a ni. Hemi atana sorkarin kum khata a sum sen tur hi US dollar maktaduai 24 vela chhut a ni.
Parliament-a thlawna sanitary products sem a nih theihna tur, Period Products (Free Provision) Scotland Bill lungrual taka pass a ni chu lawmthu sawiin, First minister Nicola Sturgeon chuan hei hi hmeichhiate tana policy pawimawh tak a ni, a ti. Hetiang dan siam thei hmasa ber an ni chu a inchhuang hle tih a sawi bawk.
Kum 2018 khan Scotland sorkar chuan school, college leh university-ah sanitary products hi a thlawnin a lo sem ṭan tawh a, khawvela sem hmasa ber ram a lo ni tawh bawk a ni.
Children charity, Plan International-in kum 2017-a zirchianna a neihah khan UK-a zirlai hmeichhiate zinga 10% chuan sanitary products leina hi an nei lo nia chhut a ni a, hei vang hian tam takin class pawh an ṭhulh phah fo a ni.
UK-ah hian sanitary products-ah chhiah 5% lak a ni ṭhin a, hemi chungchangah hian official-te chuan tax rate siatmu European Union (EU) rules an lo sawisel fo tawh a ni. Mahse EU an chhuahsan tawh avangin tax rate pawh an siamṭha thei tawh dawn a, Britain finance minister Rishi Sunka chuan nakkum January thla aṭangin 'tampon tax' chu an tibo dawn tih a lo sawi tawh.