Syria mi maktaduai 3 chuangin ṭanpui ngai

UN emergency relief coordinator chuan UN Security Council hnenah Syria rama mi maktaduai thum chuang chu thlasik thleng mekah ṭanpui ngaiin an awm tih a sawi. 

Syria ram tualchhung buaina thleng fo avangin mi tam tak chu himna zawngin an tlanchhia a, heng mite hi chenna mumal ṭha lo leh in chhe tawh karah te an khawsa mek a ni. Ṭhenkhat chu khawlaiah te khawsain, puan in kaihchawpa cheng tam tak an awm bawk niin  acting assistant secretary-general for humanitarian affairs Ramesh Rajasingham chuan a sawi.  

Khua a vawt chho tawh a, hei vang hian awmna mumal nei lo leh inthuam lumna ṭha nei loin mi tam tak an awm mek a ni, a ti.

Syria pawisa hlutna tla­hniam mek leh ei leh in man to chho zel chungchangte sawichhuakin, Rajasingham chuan mi tam tak chuan an chhungkua pawh an chawm thei tawh lo tih a sawi bawk. "Syria ramah hian ei leh in kham khawp nei pha lo mi maktaduai 9.3 vel an ni tling tawh a, kum khat liam ta aiin maktaduai 1.4 in an pung tawh a ni," tiin an la pun belh zel a rinawm thu a sawi bawk. 

Syria ramah hian tual­chhung inbeihna a thleng fo a, tun thla tir lam khan airstrike vangin civil mi pariat an thi a, mi dang 15 in hliam an tuar bawk. Hliam tuar zingah hian chhawmdawl hna thawktu pahnih an tel. Thla hnih liam ta chhung khan inbeihna thlengah hian chhawmdawl hna thawktu paruk an thi tawh a ni. 

Rajasingham chuan Syria rama chhawmdawl hna thawktute dinhmun chu a him lo hle tih sawiin, heng mite hian an nunna thapin midang ṭanpui hna an thawk a ni, a ti. Syria rama health service dinhmun pawh a ṭha tawk lo hle tih a sawi a, Covid-19 hri leng nen mipuite dinhmun chu a ṭha lo hle a ni, a ti.